नेपालगन्ज: बाँकेमा ठूलो संख्यामा कोरोना संक्रमित थपिएका छन् । पछिल्लो २४ घण्टामा जिल्लाका विभिन्न प्रयोगशालामा २७२ जनाको परीक्षण गर्दा १९९ जनामा कोरोना भाइरस संक्रमण पुष्टि भएको बाँकेका कोरोना फोकलपर्सन तेज वलीले जानकारी दिनुभयो ।

भेरी अस्पतालको प्रयोगशालामा गएको २४ घण्टामा १ सय ८३ नमुना परीक्षण गरिएकोमा १ सय २७ जनामा भाइरस संक्रमण पुष्टि भएको अस्पतालले जनाएको छ । थपिएका अधिकांशमा लक्षण चिन्ह देखिएको भेरी अस्पतालले जनाएको छ ।

एकै दिन यति धेरै संख्यामा संक्रमित पहिचान भएको विगत १ वर्षमा यो पहिलो पटक भएको अस्पतालका मेसु डा प्रकाश थापाले जानकारी दिनुभयो । यसले कोभिडको संक्रमण समुदायस्तरमा व्यापक रुपमा फैलिसकेको संकेत गर्ने उहाँको भनाइ छ ।

संक्रमण पुष्टि भएका अधिकांशमा लक्षण चिन्ह देखिएको छ भने अधिकांश युवाहरु रहेका छन् । यस्तै नेपालगन्ज मेडिकल कलेजमा गरिएको नमुना परीक्षणमा सतप्रतिशतमा पोजेटिभ देखिएको थियो ।

विहीबार ४५ जनाको नमुना संकलन गरिएको थियो । त्यसको रिपोर्ट आज सार्वजनिक गर्दै अस्पतालले ४५ जनामै भाइरस संक्रमण देखिएको जनाएको छ । बागेश्वरी ल्याबमा २३ जना र नेपालगन्ज स्थित जमुनाह नाकामा रहेको हेल्थ डेस्कमा ४ जना गरि एकैदिन १९९ जनामा संक्रमण पुष्टि भएको हो ।