नेपालगन्जः अन्तर्राष्ट्रिय महिला दिवसको अवसर पारेर नेपालगन्जस्थित मेडिसिटी क्लिनिकले आयोजना गरेको दुई दिने निःशुल्क महिला स्वास्थ्य शिविर सफलतापूर्वक सम्पन्न भएको छ ।
दुई दिनसम्म चलेको उक्त शिविरमा विभिन्न ६८ जना महिलाले स्वास्थ्य जाँच तथा परामर्श सेवा प्राप्त गरेका छन् ।
महिलाको स्वास्थ्यप्रति सचेतना अभिवृद्धि गर्ने तथा विशेषज्ञ स्वास्थ्य सेवामा सहज पहुँच प्रदान गर्ने उद्देश्यले शिविर आयोजना गरिएको क्लिनिकले जनाएको छ ।
शिविरमा स्तन तथा पेट सम्बन्धी विभिन्न परीक्षणहरू निःशुल्क रूपमा उपलब्ध गराइएको थियो ।
त्यसअन्तर्गत स्तन अल्ट्रासाउन्ड, पेटको अल्ट्रासाउन्ड तथा गर्भावस्थामा भ्रूणको वृद्धि जाँच गरिएको थियो ।
स्वास्थ्य शिविरमा फिटल मेडिसिन विशेषज्ञ डा. ट्विंकल धानुका कानोडिया तथा इन्टरभेन्शनल रेडियोलोजिस्ट डा. रितेश कुमार कानोडियाले सहभागी महिलालाई विशेष परामर्श तथा स्वास्थ्य सेवा प्रदान गरेका थिए ।
उनीहरुको विशेषज्ञता र अनुभवका कारण धेरै महिलाले समयमै आवश्यक स्वास्थ्य जाँच तथा स्वास्थ्यसम्बन्धी महत्वपूर्ण परामर्श प्राप्त गरेका थिए ।
मेडिसिटी क्लिनिकका प्रबन्ध निर्देशक डा. नितेश कुमार कानोडियाका अनुसार समुदायमा गुणस्तरीय तथा विशेषज्ञ स्वास्थ्य सेवामा पहुँच विस्तार गर्ने उद्देश्यले यस्ता जनस्वास्थ्य उन्मुख कार्यक्रमहरू आगामी दिनमा पनि निरन्तर सञ्चालन गरिनेछ ।
क्लिनिकले कार्यक्रम सफल बनाउन सहयोग पुर्याउने सम्पूर्ण स्वास्थ्यकर्मी, स्वयंसेवक तथा सहभागी प्रति आभार व्यक्त गरेको छ ।
