नेपालगन्ज: बाँकेमा आज थप २८२ जनामा कोरोना भाइरस संक्रमण पुष्टि भएको छ । जिल्लामा रहेका २ प्रयोगशालाको परीक्षणमा २८० जना र जमुनाह स्थित हेल्थ डेस्कमा गरिएको एन्टिजेन परीक्षणमा २ जना गरि थप २८२ संक्रमित थपिएका हुन् ।
नेपालगन्ज मेडिकल कलेजको प्रयोगशालामा १५२ नमुना परीक्षण गर्दा १२८ जना र बागेश्वरी ल्याबमा १८० जनाको नमुना परीक्षण गर्दा १५२ जनामा संक्रमण पुष्टि भएको जिल्ला कोभिड १९ संकट व्यवस्थापन केन्द्रका फोकलपर्सन तेज वलीले जानकारी दिनुभयो ।
जमुनाह स्थित हेल्थ डेस्कमा ३४ जनाको परीक्षण गर्दा २ जना संक्रमित थपिएका छन् । यसअघि आजै भेरी अस्पतालले बैशाख १५ गते संकलन गरिएका नमुनाको रिर्पोट सार्वजनिक गरेको थियो । भेरीमा २४ घण्टामा २८८ नमुना जाँच गर्दा २१४ जनामा संक्रमण पुष्टि भएको जनाएको थियो ।
यस्तै जिल्लाका कोभिड फोकलपर्सन वलीका अनुसार बिहिबार बाँकेमा २४४ जना संक्रमण मुक्त भएर डिस्चार्ज भएका छन् । डिस्चार्ज हुनेमा १०० जना महिला र १४४ जना पुरुष छन् ।
