नेपालगन्जः रुकुमपश्चिमको सानीभेरी गाउँपालिकामा भएको अटो दुर्घटनामा परेर सिनियर अहेब नरबहादुर खत्रीको उपचारको क्रममा मृत्यु भएको छ ।
सानीभेरी गाउँपालिकाको वडा नम्बर ६ स्थित आधारभूत स्वास्थ्य सेवा केन्द्रमा सिनियर अहेब पदमा कार्यरत ४३ वर्षीय खत्री गत चैत ११ गते वडा नम्वर ३ को बेलटापु नजिकै भएको अटो दुर्घटनामा परेर गम्भीर घाइते भएका थिए।
उनलाई उपचारका लागि तत्काल चौरजहारी अस्पताल हुँदै प्रदेश अस्पताल सुर्खेत लगिएको थियो । त्यहाँ पनि उपचार सम्भव नभएपछि उनलाई नेपालगन्ज हुँदै भारतको लखनउ लगिएको थियो ।
उनको टाउको, गर्दन, मेरुदण्ड लगायतका शरिरका विभिन्न भागमा गम्भिर चोट लागेको थियो । सानीभेरी गाउँपालिकाका प्रमुख प्रशासकीय अधिकृत दीपक बुढाथोकीले शनिबार बिहान उपचारको क्रममा उनको निधन भएको जानकारी दिए ।
उनले सानीभेरी गाउँपालिकाले एउटा कर्तव्यनिष्ठ, इमानदार, कुशल स्वास्थ्यकर्मी गुमाएको बताए । भारतको लखनउस्थित म्याक्स अस्पतालमा खत्रीको उपचारका क्रममा मृत्यु भएको हो ।
उनी वडा नम्बर ६ स्थित आधारभूत स्वास्थ्य सेवा केन्द्रबाट गाउँपालिकाको कार्यालयमा आएर भूकम्पको विस्तृत क्षति आकलनका लागि आएको प्राविधिकहरूको टोलीलाई लिएर वडा नम्बर ४ तर्फ जाँदै गर्दा दुर्घटनामा परेका थिए ।
सानीभेरी गाउँपालिका ४ घर भएका खत्री हाल दाङ बस्दै आएका थिए। उनको श्रीमती, एक छोरा र एक छोरी छन् ।
