नेपालगन्ज १८,कात्तिक ।
कोरोना भाइरस संक्रमण मुक्त भई मंगलबार बाँकेमा ३२ जना डिस्चार्ज भएका छन् ।
जिल्लाका विभिन्न आइसोलेसन र होम आइसोलेसनमा स्वास्थ्य लाभ गरिरहेका ३२ जना डिस्चार्ज भएको बाँकेका कोरोना फोकल पर्सन नरेश श्रेष्ठले जानकारी दिनुभयो ।
११ महिला र २१ पुरुष गरि ३२ जना १० दिन आइसोलेसन बसाई सकेर डिस्चार्ज भएको जिल्ला कोभिड १९ संकट व्यवस्थापन केन्द्रले जनाएको छ । कोरोना संक्रमण देखिएपछि उनिहरुलाई कात्तिक ८ गते आइसोलेसनमा राखिएको थियो ।
लक्षण चिन्ह नदेखिएका सामान्य अवस्थाका संक्रमित विरामीहरुलाई अहिले ७ दिन थप होम आइसोलेसनमा बस्न भनि १० दिनमा डिस्चार्ज गर्ने गरिएको छ ।
मंगलबार संक्रमण जितेर डिस्चार्ज हुनेहरुमा नेपालगन्ज १० कि २ वर्षिय बालिका समेत रहेको फोकल पर्सन श्रेष्ठले जानकारी दिनुभयो । योसँगै अब बाँकेमा संक्रमण मुक्त भई डिस्चार्ज हुनेको कुल संख्या २ हजार ९६० पुगेको छ ।
मंगलबार बिहान सम्म बाँकेका २१८ जना र जिल्ला बाहिरका १७ जना गरि २३५ जना जिल्लाका विभिन्न आइसोलेसनमा स्वास्थ्य लाभ गरिरहेका छन् ।
