नेपालगन्जः नेपाल औषधि व्यवसायी संघले विहीबार आफ्नो ४८ औं स्थापना दिवसका अवसरमा नेपालगन्जमा विचार गोष्ठि गरेको छ । दिवसको अवसरमा औषधि व्यवसायी संघ बाँकेले अग्रज व्यवसायीसँग विचार गोष्ठि गरेको हो ।
संघका बाँके अध्यक्ष बसन्त शर्माले यो महामारीमा पनि व्यवसायीहरुले औषधि उपभोक्ताहरुलाई गुणस्तरीय र तोकिएकै मूल्यमा औषधि विक्रीवितरण गरिरहेको दावी गर्नुभयो ।
उहाँले औषधि व्यवसायीबाट ठगिएका केही गुनासो आएपनि त्यस्ता व्यवसायीलाई कारवाही गर्ने सवालमा संघ फराकिलो रहेको भन्दै संघले संरक्षण नगर्ने स्पष्ट पार्नुभयो छ ।
कोभिड महामारीका कारण नेपालमै उत्पादन भएका औषधिले माग धान्न गाह्रो छ । त्यसका लागि भारतमा उत्पादित औषधिहरु पनि आयात गर्नुपर्ने अवस्था छ। त्यसका लागि राज्यले पहल गर्नु पर्ने शर्माको भनाइ छ ।
‘गुणयुक्त, असरयुक्त सुरक्षित औषधिको आपूर्ति, हाम्रो प्रतिबद्धता’ भन्ने नाराका साथ मनाइएको दिवसको पूर्वसन्ध्यामा संघले नेपालगन्जमा रक्तदान कार्यक्रम गरेको थियो । बाँकेमा करिव ५ सयको हाराहारीमा औषधि व्यवसायी छन् ।
