नेपालगन्ज २८, कात्तिक ।
कान्ति आरोग्य अस्पताल नेपालगन्जको एम्बुलेन्स चलाउनुहुन्छ धर्मवीर काहर । नेपालगन्जमा एउटामात्र त्यही एम्बुलेन्स हो जस्मा आईसीयू र भेन्टिलेटर छ । गम्भीर प्रकृतिका विरामीलाई यही एम्बुलेन्सले बोक्ने गर्छ । ‘कोरोनाको त्रासमा विरामी बोक्नु पर्यो हदै डर लाग्थ्यो नेपालगन्ज–१६ जयसपुरका धर्मवीर भन्नुहुन्छ–‘अव त डर लाग्दैन् ।’

कोभिड महामारीमा विरामी बोक्दाका सुरुवाती दिनहरुमा उहाँले खेप्नु परेका पीडा धेरै छन् । ‘परिवारले समेत कस्तो बिरामी बोकेर आएको हो, कोरोनाको भाइरस पो छ कि, बरु उतै कोठामै बस्ने गर्नु भन्ने गथ्र्ये,’ धर्मवीरको भनाइ छ । ‘घर परिवारले भन्दा पनि छिमेकीले एम्बुलेन्स चलाउने मान्छे यो अवधिभर त नआए हुन्थ्यो भन्ने गर्थे’ उहाँले भन्नुभयो । उहाँले विभिन्न आन्दोलन, बन्द हड्ताल, चक्काजाम, नाकाबन्दी सबै समयमा एम्बुलेन्स चलाएर विभिन्न जिल्ला पुग्नुभयो ।

बन्द हड्तालमा समेत एम्बुलेन्स चालकलाई बास र खाना खाजाको कुनै समस्या भएन् । तर कोरोना महामारीमा भने भोकै बस्नुपर्ने बाध्यता रहेको उहाँको भनाइ छ । ‘नेपाल बन्द र नाकाबन्दीको बेला त खाना खान पाइन्थ्यो, तर योपालि त भोकै कुद्नु पर्यो’ धर्मबीरले भन्नुभयो–‘घरमा खाना खान एम्बुलेन्स लिएर जाँदा पनि टोल छिमेकका मान्छे तर्सिने, कस्ता बिरामी लिन आए या कस्ता बिरामी छोड्न आए भनेर स्थानीयले कौशी र झ्यालबाट चियाउँथे।’ अहिले त एम्बुलेन्स देख्यो की बालबालिकाले समेत कोरोनाको बिरामी बोकेर हिँडेको एम्बुलेन्स भन्दै जिस्काउने गरेको उहाँको अनुभव छ ।

तस्विरः नेपालगन्ज ग्यालरी

‘आफूले जानेको काम नै यही हो, एम्बुलेन्स चलाउनु पेसामात्र नभएर सेवा हो, तर हामीलाई देख्यो की कोरोना आयो, कोरोना भाइरस कहाँ हिँडेको छस् भन्दै जिस्काउँछन्,’ उहाँले भन्नुभयोे । उहाँ आफै पनि कोभिड पोजेटिभ भएर निको भएर अहिले फेरि सेवामा फर्किसक्नुभएको छ ।

यस्तो महामारीको बेला दिनरात नभनी बिरामीको सेवामा खटिएका एम्बुलेन्स चालकको कोरोनासँग जुध्न भइरहेका प्रयासमा उत्तिकै योगदान छ । आफ्नो ज्यानको ख्यालै नगरी बिरामी ओसार्न खटिरहेका उनीहरुलाई समाजमा विभिन्न शंका तथा अपहेलनाको दृष्टिकोणले हेर्दा उनीहरुको मनोवलमा पुराएको चोट अझै निको भएको छैन् ।

तर धर्मवीर भन्नुहुन्छ–‘सुरुवाती दिन सम्झदा त मन खिन्न् हुन्छ तर जुन सेवा दिने प्रणका साथ एम्बुलेन्स चलाउने जिम्मेवारी छ त्यसले सधैं यही सेवालाई निरन्तरता दिओस् भन्छ ।’ उहाँको चाहना अव यही सेवामा रमाउने छ ।