हुम्ला ७, माघ ।
हुम्ला जिल्लाका दुर्गम स्वास्थ्य चौकीमा स्थापना भएका प्रसुती गृहमा बेबी रेडियन्ट वार्मर मेशिन जडान सुरु भएको छ। चिसो अत्याधिक हुने हुम्लामा जन्मने नबजात शिशुको तापक्रम ब्यबस्थापन गर्न उक्त मेशिन जडान सुरु भएको हो।
सिमकोट गाउँपालिकाको वडा नम्बर ७ को डाँडाफया स्वास्थ्य चौकीमा उक्त मेशिन जडान भएको छ। मेशिन जडानसँगै अब नवजात शिशुको तापक्रम ब्यबस्थापन गर्न सहज हुने गाउँपालिकाका स्वास्थ्य संयोजक दान बहादुर बोहराले बताउनुभयो। उक्त गाउँपालिकाको यो तेस्रो स्वास्थ्य चौकीमा मेशिन जडान भएको हो।
यसअघि वडा नम्बर २ को ठेहे र ३ को बरगाँउमा जडान भइसकेको छ। अब चाँडै नै वडा नम्बर ८ को स्याँडामा पनि सो मेशिन जडानको तयारी भई रहेको छ । अव सिमकोटमा जिल्ला अस्पतालमा सहित यस्ता मेशिनको संख्या पाँच वटा पुगेको छ।
यी मेशिनका जडान पछि प्रसुती गृहमा जन्मने नबजात शिशुलाई सिताङ हुनवाट बचाउने, न्यानो राख्ने, कम जन्म तौल भएका बच्चालाई अन्य जटिलताबाट बचाउन सहयोग पुग्ने छ । यसबाट नवजात शिशुको मृत्युदरमा समेत कमी आउने बिस्वास गाउँपालिकाले लिएको छ।
