नेपालगन्जः बाँकेको राप्ती सोनारीमा बेवारिसे अवस्थामा नवजात शिशु भेटिएका छन् । बुधवार विहान राप्तीसोनारी गाउँपालिका वडा नं.८ ओभरीस्थित मकै बारीमा फालिएको अवस्थामा भेटिएको शिशुलाई सकुशल उद्दार गरिएको प्रहरीले जनाएको छ ।
स्थानीय ज्योति खड्का शाहले आफ्नो मकै बारीमा रोइरहेको सुनेपछि हेर्न जाँदा सालनाल सहितको बच्चा फेला पारेको स्थानीयबासीले जानकारी दिए ।
बच्चा कस्ले जन्माएर मकै बारीमा फालेको हो त्यसको बारेमा अहिलेसम्म केही पत्ता लाग्न नसकेको प्रहरीले जनाएको छ ।
अहिले बच्चालाई नेपालगन्ज मेडिकल कलेज कोहलपुरको एनआइसीयूमा प्रहरी र अस्पताल प्रशासनको संरक्षणमा राखेर उपचार भइरहेको पनि प्रहरीले जनाएको छ ।
