कोहलपुरः कोहलपुर नगरपालिकाले नगर अस्पतालबाट अव विशेषज्ञ सेवा दिने भएको छ । कोहलपुर नगरपालिकामा रहेको नगर अस्पतालबाट आइतवार, बुधवार र शुक्रबार विशेषज्ञ सेवा प्रदान गरिने छ । नेपालगन्ज मेडिकल कलेज कोहलपुरसँगको सहकार्यमा विशेषज्ञ सेवा दिन लागिएको स्वास्थ्य वीमा संयोजन समितिका सदस्य वीरेन्द्र कुमार शाहले जानकारी दिनुभयो ।
आइतवार प्रसूति तथा स्त्रीरोग विशेषज्ञ सेवा, बुधवार जनरल फिजिसियन र शुक्रबार शल्य चिकित्सा सेवा प्रवाह गर्ने शाहको भनाइ छ । स्वास्थ्य वीमा वोर्डमा सूचिकृत मेडिकल कलेज कोहलपुरका चिकित्सकहरुले नगर अस्पतालबाट विशेषज्ञ सेवा प्रदान गर्नेछन् । जटिल खालका समस्या देखिएका बिरामीहरुलाई मेडिकल कलेजमा रिफर गरिनेछ ।
कोहलपुर नगरपालिका स्वास्थ्य वीमा संयोजन समिति संयोजक समेत रहेका नगर प्रमुख पूर्णप्रसाद आचार्यको अध्यक्षतामा बसेको बैठकले वैशाखको पहिलो सातादेखि विशेषज्ञ सेवा दिने तयारी गरेको हो । मेडिकल कलेजमा वीमा कार्यक्रम बैशाख पहिलो सातादेखि सुरु गर्ने तयारी छ ।
उक्त कार्यक्रम सुरु भएपछि नगर अस्पतालमा पनि विशेषज्ञ सेवा सुरु हुने शाहले बताउनुभयो । नगर पालिकाले आफ्नै फार्मेसी समेत संचालनको तयारी गरेको छ । त्यसका लागि कर्मचारी माग भइसकेको स्वास्थ्य शाखा प्रमुख अनिलसेन ठकुरीले जानकारी दिनुभयो ।
