नेपालगन्जः प्रधानमन्त्री पुष्पकमल दाहाल प्रचण्डले सेवाग्राहीले सरकारी अस्पतालसहित सरकारी सेवा लिँदा लाइनमा लागेर सास्ती खेप्नुपर्ने अवस्था १ महिनाभित्र अन्त्य नभए जिम्मेवार पदाधिकारीलाई कारबाही गरिने चेतावनी दिनुभएको छ ।

मंगलबार सिंहदरबारस्थित प्रधानमन्त्री तथा मन्त्रिपरिषद कार्यालयमा सचिवहरुसँगको छलफलपछि उनले सरकारी अस्पतालमा बिरामीको उपचार गर्दा लाइन लाग्नु पर्ने अवस्थाको १ महिनाभित्र अन्त्य नभए जिम्मेवार पदाधिकारीलाई कारबाही गरिने चेतावनी दिनुभयो ।

अब सरकार गठनको एक महिनाभित्र सरकारी अस्पतालमा बिरामीको उपचार,राहदानी, राष्ट्रिय परिचयपत्र, सवारी लाइसेन्स, शिक्षा मन्त्रालयबाट प्रदान गरिने ‘नो अब्जेक्सन सर्टिफिकेट’ मालपोत, नापी, कर दस्तुर बुझाउने ठाउँमा सेवाग्राहीले अहिले जस्तै लाइनमा बस्ने सास्ती देखियो भने निर्ममतापूर्वक जिम्मेवार पदाधिकारीलाई कारबाही गर्नुपर्ने अवस्थामा आउनेछ दाहालले दिएको लिखित निर्देशनमा उल्लेख छ।

प्रधानमन्त्री प्रचण्डले मन्त्रालयका सचिवहरुलाई जनसरोकार र सार्वजनिक सेवालाई चुस्त दुरुस्त बनाउने सन्दर्भमा ३० बुँदे निर्देशन समेत दिनुभएको छ ।