नेपालगन्जः बाँकेको जानकी गाउँपालिकामा निःशुल्क आँखा शिविरको आयोजना गरिएको छ । यही मंसिर २१ गतेदेखि २८ गतेसम्म ६ वटै वडामा आँखा शिविर हुन लागेको हो ।
नेपाल नेत्रज्योति संघ, फत्तेबाल आँखा अस्पताल फुलटेक्राको आयोजना, तेज कोहली रुइत फाउण्डेसनको सहयोग तथा जानकी गाउँपालिकाको समन्वयमा शिविर आयोजना गरिएको फत्तेबाल आँखा अस्पतालले जनाएको छ ।
मंसिर २१ गते स्वास्थ्य चौकी साईगाउँ, २३ गते स्वास्थ्य चौकी बेलभार, २५ गते स्वास्थ्य चौकी इन्द्रपुर, २६ गते स्वास्थ्य चौकी खजुराखुर्द, २७ गते स्वास्थ्य चौकी बेलहरी र २८ गते स्वास्थ्य चौकी गनापुरमा शिविर बस्ने छ ।
विहान १० बजेदेखि सुरु हुने शिविरमा नाम दर्ता, आवश्यक औषधि र मोतिबिन्दुका बिरामीको निःशुल्क शल्यक्रिया हुने छ ।
शल्यक्रियाका लागि छनौट भएका बिरामीको फत्तेबाल आँखा अस्पतालमा शल्यक्रिया गरिने बताइएको छ ।