नेपालगन्ज: नेपालले कोभिड–१९ विरुद्धको खोप कार्यक्रममा ७० प्रतिशत भन्दा माथिको सफलता हासिल गरेको छ । स्वास्थ्य तथा जनसंख्या मन्त्रालयका अनुसार नेपालका कुल जनसंख्याको ७३ प्रतिशतले पहिलो मात्रा खोप लगाएका छन् ।

दोस्रो तथा पूर्ण मात्रा खोप लगाउनेको संख्या भने ७० प्रतिशत भन्दा माथि रहेको छ । ‘जसका कारण नेपाल पनि कोभिड–१९ विरुद्धको खोप कार्यक्रममा ७० प्रतिशत भन्दा माथिको कभरेज हासिल गर्ने मुलुकहरुको सूचीमा समावेश भएको छ’ स्वास्थ्य तथा जनसंख्या मन्त्रालयका सहप्रवक्ता डा. समीरकुमार अधिकारीले भन्नुभयो ।

नेपालले पहिले १८ वर्षमाथिका नागरिकलाई मात्र खोप लगाएको थियो । पछि १२ देखि १८ वर्षका बालबालिकाका लागि पनि खोप सुरु गरिएको थियो । नेपालमा १२ वर्षभन्दा माथिको जनसंख्यामा पहिलो मात्रा खोप लगाउने ९२ प्रतिशत रहेका मन्त्रालयले जनाएको । दोस्रो तथा पूर्ण मात्रा खोप लगाउने १२ देखि १८ वर्षसम्मका बालबालिकाको कभरेज ८८ प्रतिशत छ ।