दाङ: दाङको तुलसीपुरमा झाडापखालाबाट एक बालकको मृत्यु भएको छ । तुलसीपुर उपमहानगरपालिका ११ उरहरि निवासी साढे दुई वर्षका अनमोल पुनको झाडापखालाबाट मृत्यु भएको राप्ती प्रादेशिक अस्पताल तुलसीपुरका इमर्जेन्सी इन्चार्ज धनबहादुर केसीले जानकारी दिनुभयो ।
झाडापखालाबाटै चार जना बिरामी समेत परेका छन् । बिरामी पर्नेहरुमा ५० वर्षीय बुद्धिराम पुन, ४० वर्षीया गौरी पुन, ५८ वर्षीया कलसिङ पुन र मीना पुन रहेका छन् । उनिहरुको राप्ती प्रादेशिक अस्पताल तुलसीपुरमा उपचार भइरहेको इमर्जेन्सी इन्चार्ज केसीले जानकारी दिनुभयो। चार बिरामीमध्ये बुद्धिरामको अवस्था गम्भीर छ ।
उनिहरुमा झाडापखाला लाग्ने, बान्ता हुने लक्षण देखापरेको अस्पतालले जनाएको छ। गर्मीयाम सुरु भएसँगै अस्पतालमा झाडापखाला लगायतका बिरामी उपचारका लागि आउने क्रम बढेको अस्पतालले जनाएको छ ।