नेपालगन्जः गण्डकी प्रदेशको तनहुँ जिल्लामा ठूलो संख्यामा स्वास्थ्यकर्मी संक्रमित बनेका छन् ।
तनहुँ जिल्लामा मात्रै ४२ स्वास्थ्यकर्मीमा कोरोना संक्रमण देखिएको गण्डकी प्रदेश स्वास्थ्य निर्देशनालयले जानकारी दिएको छ ।
स्वास्थ्य निर्देशनालयका अनुसार भिमाद नगरपालिका–६ स्थित भिमाद प्राथमिक स्वास्थ्य चौकीका १७ जनालाई कोरोना देखिएको छ ।
अधिकांशलाई कोरोना पुष्टि भएपछि स्वास्थ्य चौकीको सेवा बन्द गरिएको छ ।
शुक्लागण्डकी–४ दुलेगौडा बजारमा रहेको खैरेनीटार स्वास्थ्यचौकीमा कार्यरत ६ जना स्वास्थ्यकर्मीमा पनि संक्रमण पुष्टि भएको छ । आँबुखैरेनी गाउँपालिकामा स्वास्थ्यकर्मीसहित १४ कर्मचारीलाई कोरोना संक्रमण देखिएको छ।
यसबाहेक जिल्लाका विभिन्न ठाउँमा कार्यरत ४२ जनामा स्वास्थ्यकर्मीमा कोरोना संक्रमण देखिएको स्वास्थ्य निर्देशनालय गण्डकीले जानकारी दिएको छ ।
संक्रमित भएकाहरुमा ज्वरो आउने, टाउको भारी हुने, खोकी लाग्ने, जीउ दुख्ने, नाकबाट लगातार सिँगान बगिरहने र घाँटी खसखस हुने जस्ता लक्षण देखिएका छन् ।
