नेपालगन्जः कोरोना भाइरस संक्रमणबाट बाँकेमा आज थप एकजनाको मृत्यु भएको छ । भेरी अस्पतालमा उपचारका क्रममा दाङकी ४१ वर्षीया महिलाको मृत्यु भएको जिल्ला कोभिड–१९ व्यवस्थापन केन्द्र बाँकेले जनाएको छ ।
केन्द्रका फोकलपर्सन तेज वलीका अनुसार तुलसीपुर उपमहानगरपालिका–६ की ती महिलालाई पुष ३० गते कोभिड पुष्टि भएको थियो । उनी त्यसैदिन भेरीको आइसोलेसन वार्डमा भर्ना भएकी थिइन् ।
दुवै खोप नलगाएकी उनको स्वास्थ्यमा सुधार नआउँदा दिउँसो सवा एक बजे मृत्यु भएको हो । मंसिर २६ गते यता उनी बाहेक अरुको कोभिडबाट मृत्यु भएको थिएन् ।
योसँगै बाँकेमा उपचारका लागि आएका बाहिरी जिल्लाका मृतक संख्या चार सय ३७ पुगेको छ । अस्पतालमा अझै १८ जना संक्रमित उपचाररत रहेका छन् । तीमध्ये केहीको अवस्था गम्भीर छ ।