नेपालगन्जः कोरोना संक्रमण दिनहुँ बढ्दै गएपछि जिल्ला प्रशासन कार्यालय बाँकेले भिडभाड नगर्न र स्वास्थ्य मापदण्ड पालना गर्न आदेश जारी गरेको छ ।
बाँकेका प्रमुख जिल्ला अधिकारी सुर्यबहादुर खत्रीले मंगलबार विभिन्न चार बुँदे आदेश जारी गर्दै भिडभाड नगर्न र स्वास्थ्य मापदण्ड पालना गर्न आग्रह गर्नुभएको हो ।
आदेश अनुसार सार्वजनिक स्थलमा सबै प्रकारका राजनीतिक तथा धेरै जना उपस्थित हुने गरी प्रशासनिक, सामाजिक एवम् त्यही प्रकृतिको कार्यकम तथा मेला, भेला, महोत्सव आयोजना गर्न रोक लगाइएको छ ।
यस्तै सार्वजनिक स्थलमा २५ जनाभन्दा बढी भेला हुने गरी कार्यक्रम आयोजना नगर्न प्रजिअ खत्रीको आदेशमा भनिएको छ ।