नेपालगन्जः भेरी अस्पतालमा कोभिड संक्रमित गर्भवतिको शल्यक्रियामार्फत बच्चा (छोरा ) निकालिएको छ ।
अस्पतालका स्त्रीरोग विशेषज्ञ डा नवीन बुढाथोकी नेतृत्वको टीमले बर्दिया बढैयाताल गाउँपालिका-१ की २६ वर्षीया संक्रमित महिलाको शल्यक्रियामार्फत बच्चा निकालेको हो ।
चार बर्ष अघि पनि उनको शल्यक्रियाबाटै बच्चा निकालिएको थियो । सात दिन अघि कोरोना भाइरस संक्रमित ती महिला होम आइसोलेसनमा बसेकी थिइन् ।
बच्चा र आमा दुवैको स्वास्थ्य अवस्था सामान्य रहेको डा बुढाथोकीले जानकारी दिनुभयो । दिउँसो १ः २५ बजे शल्यक्रिया सम्पन्न भएको थियो । बच्चाको तौल ३ किलो रहेको छ ।
यसअघि नेपालगन्ज मेडिकल कलेजमा संक्रमितको शल्यक्रियामार्फत बच्चा निकालिने गरिएको थियो ।
