जाजरकोटः जिल्लाको कुशे गाउँपालिका–८, औलरिजामा झाडापखालाले दुई बालकको मृत्यु भएको छ । पखालाका कारण औलरिजामा एक वर्षीय पुजना तिरुवा र ९ महिनाका जगत खड्काको मृत्यु भएको हो । पखाला लाग्ने, वान्ता हुने र ज्वरो आउने लगायत लक्षण देखा परेका दुवै जनालाई उपचारमा लैजाँदै गर्दा मृत्यु भएको हो ।

छोरा जगतलाई पखालाका साथै वान्ता आउन थालेपछि उपचारका लागि स्थानीय मेडिकलमा लैजाँदै गर्दा बाटोमै मृत्यु भएको बाबु खिमबहादुर खड्काले बताउनुभयो । झाडापखालाले गाउँमा दर्जन बढी दुधे बालक बिरामी परेको खड्काले बताउनुभयो ।

बालबालिका बिरामी परेको खबर आएपछि जाजरकोट अस्पतालका डा इन्द्र थापाको टोली औषधिसहित औलरिजा पुगेको डा अमिन शाहले बताउनुभयो । टोलीले औलरिजामा झाडापखालाका ४० ५० जना बिरामीको उपचार गरेको डा शाहले बताउनुभयो ।