नेपालगन्ज: कोरोना संक्रमित थप दुईजनाको मृत्यु भएको छ । भेरी अस्पताल नेपालगन्ज र नेपालगन्ज मेडिकल कलेजमा एक-एक जनाको उपचारको क्रममा मृत्यु भएको अस्पतालहरुले जनाएका छन् ।
तुलसीपुर उपमहानगरपालिका-६ दाङका ४६ वर्षिय पुरुष र नेपालगन्ज उपमहानगरपालिका-४ बाँकेका ५८ वर्षिय महिलाको कोभिड संक्रमणका कारण मृत्यु भएको जिल्ला कोभिड १९ संकट व्यवस्थापन केन्द्रका फोकलपर्सन तेज ओलीले जानकारी दिनुभयो ।
तुलसीपुर-६ दाङका ४६ वर्षिय पुरुष स्वास्थ्यमा समस्या आएपछि बैशाख १३ गते भेरी अस्पतालमा भर्ना हुनुभएको थियो । त्यसको भोलीपल्ट पीसीआर परीक्षण गर्नुभएका उहाँको आज दिउँसो ३ बजे मृत्यु भएको अस्पतालले पुष्टि गरेको छ ।
नेपालगन्ज-४ का ५८ वर्षिय महिला उपचारका लागि नेपालगन्ज मेडिकल कलेजमा बैशाख १५ गते भर्ना हुनुभएको थियो । १६ बैशाखमा कोभिड टेस्ट गर्नुभएको उहाँको आज बिहान ९:१५ बजे मृत्यु भएको हो।
योसँगै कोभिड संक्रमणका कारण बाँकेमा जिल्ला बाहिरका ११८ र जिल्लाका १२० जनाले ज्यान गुमाईसकेका छन् ।
