काठमाडौं: पूर्वप्रधानमन्त्री तथा जसपा संघीय परिषद् अध्यक्ष बाबुराम भट्टराईको न्युरो–इन्डोक्राइनको ट्युमरको शल्यक्रिया हुने भएको छ।
वीर अस्पतालमा डा.सुबोध अधिकारीको नेतृत्वमा शल्यक्रिया सम्पन्न हुने भट्टराईका स्वकीय सचिव विश्वदीप पाण्डेले जानकारी दिनुभयो । उहाँले नेता भट्टराई आजै अस्पताल भर्ना हुने र भोलि वैशाख १७ गते नै शल्यक्रिया हुने जानकारी दिनुभयो ।
यसअघि चिकित्सकहरुले इन्डोक्राइनको ट्युमर भएको शंका गरेपछि भारतको दिल्लीमा भट्टराईको स्वास्थ्य परीक्षण गरिएको थियो । बायोप्सी, डीओटीए एनओसी परीक्षण, पीईटी सीटी स्क्यानसहित अन्य परीक्षणपछि चिकित्सकहरुले क्यान्सर नभएको जनाएका थिए ।
पेटमा समस्या देखिएपछि भट्टराईले भारत जानु अघिसम्म लामो समयदेखि काठमाडौंको निदान अस्पतालमा परीक्षण तथा उपचार गराउँदै आउनुभएको थियो । फागुन ९ गते भारत पुगेर उपचार गराउनुभएका भट्टराईलाई चिकित्सकहरुले देखिएको ट्युमरलाई ढिला नगरी दुई तीन महिनाभित्रै शल्यक्रियाद्वारा फाल्नुपर्ने सुझाव दिएका थिए ।
त्यही सुझाव अनुसार उहाँ शल्यक्रियाका लागि आजै वीर अस्पतालमा भर्ना हुन लाग्नुभएको छ ।
