काठमाडौंः राष्ट्रपति विद्यादेवी भण्डारीले कोरोना विरुद्धको खोप लगाउनुभएको छ । खोप लगाउन उहाँ त्रिवि शिक्षण अस्पताल, महाराजगञ्जको खोप केन्द्रमा पुग्नुभएको थियो । कोरोना खोप लगाएपछि सञ्चारकर्मीलाई संक्षिप्त प्रतिक्रिया दिँदै राष्ट्रपति भण्डारीले आफ्नै उमेर समूह पर्खिएर बसेकी तर बंगलादेश भ्रमणमा जानु पर्ने भएकाले खोप लगाएको बताउनुभयो ।

उहाँले सबैलाई निर्धक्क भएर खोप लगाउन अपिल गर्नुभयो । नयाँ भएको हुनाले केही शंका हुनु स्वभाविक भएपनि धेरै चरणको परीक्षण पछि मात्रै खोप आएको भन्दै उहाँले भन्नुभयो-‘धेरै चरणको परीक्षण भएको हुनाले ढुक्क हुन अनुरोध गर्छु ।’

नेपालमा कोरोना खोप अभियान १४ माघबाट सुरु भएको थियो र आइतबार साँझसम्म अहिलेसम्म १५ लाख ५० हजारले खोप लगाएको मन्त्रालयले जनाएको छ ।