काठमाडौंः ॐ अस्पताल काठमाढौं खोप केन्द्रमा १०४ वर्षीया जेष्ठ नागरिकले खोप लगाएकी छन् । मंगलबार विहान ११ बजे काठमाडौं महानगरपालिका—७ कुमारीगालकी १०४ वर्षीया जेष्ठ नागरिक मनरुपा चौलागाईले कोभिड—१९ विरुद्धको खोप लगाउनुभएको हो ।
छोरा बुहारीका साथमा उहाँ ॐ अस्पतालस्थित खोप केन्द्र पुग्नुभएको थियो । १० सन्तानकी आमा मनरुपाले कोरोना महामारीका बारेमा धेरै जानकारी राखेको बताउनुभयो । सधैं मास्क लगाएर हिड्ने गरेको र बेलाबेलामा राम्रोसँग हात धुने गरेको बताउँदै उहाँले बुढाबुढीलाई धेरै अप्ठ्यारो पार्ने कोरोना रोक्न खोप लगाएको जानकारी दिनुभयो । उहाँले ढुक्क भएर खोप लगाउन जेष्ठ नागरिकहरुलाई आग्रह पनि गर्नुभयो ।
ॐ अस्पतालका मेडिकल डाइरेक्टर डा हरिश जोशीले कोभिड—१९ विरुद्धको विश्वव्यापी लडाइ र राष्ट्रिय खोप कार्यक्रममा नेपाल सरकार र ॐ अस्पतालको सहकार्यलाई स्वीकार गरी अत्यन्त उत्साहपूर्वक सहभागि हुनुभएकोमा सम्पूर्ण जेष्ठ नागरिकहरुप्रति आभार ब्यक्त गर्नुभयो ।
