काठमाडौंः कांग्रेसका युवा नेता तथा पूर्वमन्त्री नवीन्द्रराज जोशीले आफैं श्वास फेर्न थाल्नुभएको छ । मष्तिष्कघात भएर गत शुक्रबार बिहान थापाथलीस्थित नर्भिक इन्टरनेशनल हस्पिटलमा भर्ना हुनुभएका जोशीको अवस्थामा सुधार आएको हो ।

नेता जोशीको अवस्थामा चमत्कारिक सुधार भएपछि बिहीबार बिहानदेखि नै भेन्टिलेटरको फूल सपोर्ट हटाइएको अस्पतालले जनाएको छ । उहाँको उपचारमा संलग्न न्यूरो सर्जन डा राजीव झाका अनुसार भेन्टिलेटर हटाएपछि उहाँले सामान्य रुपमा श्वास फेर्न थाल्नुभएको छ ।

स्वास्थ्य अवस्थामा तीव्र सुधार भएपछि बिहीबारदेखि पूर्ण रुपमा भेन्टिलेटरबाट निकालिएको हो । सुरुवातमा मष्तिष्कघातका कारण उहाँको बायाँ भागमा प्यारालाइसिस भएको आशंका गरिएको थियो । तर, बिहीबार साँझदेखि उहाँले बायाँ हातखुट्टा पनि सामान्य चलाउन थाल्नुभएको छ । तर, प्यारालाइसीस नै नभएको भनेर भनिहाल्ने अवस्था भने नरहेको चिकित्सकहरुको भनाइ छ ।