काठमाडौंः स्वास्थ्य तथा जनसंख्या मन्त्रालयले खोप अभियानलाई लक्षित गर्दै दैनिक प्रेस ब्रिफिङ गर्ने भएको छ ।मन्त्रालयका प्रवक्ता डाक्टर जागेश्वर गौतमले दोस्रो प्राथमिकतामा परेकाहरुका लागि फागुन २३ गते आइतबारदेखि सुरु हुने खोप अभियानलाई लक्षित गर्दै दैनिक प्रेस ब्रिफिङ गर्ने तयारी मन्त्रालयले गरेको जानकारी दिनुभयो ।

विगतका केही हप्तादेखि हप्ताको दुई पटक आइतबार र बुधबार गर्दै आएको प्रेस ब्रिफिङलाई कोभिड–१९ को खोप अभियानलाई मध्येजनर राखी आजदेखि करिब तीन हप्ता दैनिक प्रेस ब्रिफिङ गरिने गौतमको भनाइ छ ।

उहाँले हरेक दिनको पत्रकार सम्मेलनमा खोप अभियानको विषयमा सरकारको नीति, योजना, गतिविधि, उपलब्धी र चुनौतीबारे नियमित रुपमा सूचना तथा जानकारीमूलक सन्देशहरु प्रवाह गर्ने बताउनुभयो ।

डा गौतमले कोरोना संक्रमणबाट बच्न खोप लगाउनु अघि र खोप लगाएपछि पनि जनस्वास्थ्यको मापदण्ड पालना गर्नुपर्ने बताउनुभयो । उहाँले जनस्वास्थ्यको मापदण्ड पालना गर्दा कोरोना संक्रमण र अन्य सरुवा रोगबाट समेत जोगिन सकिने बताउनुभयो ।