काठमाडौंः कोरोनाविरुद्धको खोप लगाएपछि पूर्व प्रधानमन्त्री बाबुराम भट्टराईलाई ज्वरो आएको छ।

१०४ डिग्रीसम्म ज्वरो आएपछि उहाँ स्वास्थ्य जाँचका लागि बिहीबार त्रिवि शिक्षण अस्पताल महाराजगञ्ज पुग्नुभयो । विभिन्न जाँचपछि चिकित्सकको प्रत्यक्ष निगरानीमा रहने गरी डा भट्टराई बिहीबार नै घर फर्किनुभएको छ ।

हालै भारतको नयाँ दिल्ली पुगेर स्वास्थ्य जाँच गरेर फर्किएका उहाँलाई सामान्य ज्वरो आइरहेको थियो। सोही अवस्थामा बुधबार कोरोनाविरुद्धको खोप लगाएपछि ज्वरो बढेको उहाँका प्रेस संयोजक विश्वदीप पाण्डेले जानकारी दिनुभयो ।

डा भट्टराईको स्वास्थ्यलाई शिक्षण अस्पतालका साथै वीर अस्पतालका केही चिकित्सकहरुले निगरानी गर्ने भएका छन् ।