म्याग्दीः रुखबाट लडेर घाइते भएका बिरामी बोकेर उपचार लागि पोखरा जाँदै गरेको जीप दुर्घटना हुँदा एक जनाको मृत्यु भएको छ।
रुखबाट लडेर घाइते भएका मालिका-३ का ६२ वर्षीय गोविन्द रोकालाई उपचारका लागि पोखरा लैजाँदै गरेको जिप म्याग्दीको बेनी नगरपालिका-४ फापरखेतमा बिहीबार राति भएको दुर्घटना भएको हो।
मालिका गाउँपालिका-३ पात्लेबाट बिरामी लिएर बेनीतर्फ आउँदै गरेको ग१ज ६७८८ नम्बरको जिप सडकबाट म्याग्दी नदीमा खसेको थियो। जिल्ला प्रहरी कार्यालय म्याग्दीका प्रहरी नायब उपरीक्षक श्यामकुमार राईले मालिका-३ का ६२ वर्षीय गोविन्द रोकाको बेनी अस्पतालमा उपचारका क्रममा मृत्यु भएको जानकारी दिनुभयो ।
दुर्घटनामा अन्य चार घाइते भएका छन्। घाइते चालक मालिका-१ निस्कोटका ३० वर्षीय नरबहादुर रोकालाई थप उपचारका लागि पोखरा सिफारिस गरिएको छ।
यसैगरी मालिका-३ पात्लेका २९ वर्षीय रवीन्द्र रोका, २० वर्षीया रेजिना रोका र ३८ वर्षीय खगेन्द्र रोकाको बेनी अस्पतालमा उपचार भइरहेको छ।
चालकबाहेक मृतक र घाइते एकै परिवारका सदस्यहरु हुन्। तातोपानी प्रहरी चौकी, तातोपानी र पखेरका स्थानीय बासिन्दाले घाइतेको उद्धार गरेका थिए। दुर्घटनाबारे अनुसन्धान जारी रहेको प्रहरी नायब उपरीक्षक राईले बताउनुभयो ।
