ढाकाः बंगलादेशमा आइतबारबाट कोरोना विरुद्धको खोप सर्वसाधारणलाई दिन सुरु गरिएको छ। गत महिनाको अन्तमा दुई दिने परीक्षणस्वरुप कोरोनाको खोप शुरु गरेको बंगलादेशले आइतवारबाट भने देशव्यापी सुरु गरेको हो ।
बंगलादेशी स्वास्थ्य मन्त्री जाहिद मालेकले राजधानी ढाकाबाट भिडियो कन्फरेन्सिङगका माध्यमबाट स्वास्थ्यकर्मीहरुलाई सम्बोधन गर्दै विशाल खोप अभियानको उदघाटन गर्नुभएको छ ।
बंगलादेशका प्रधानमन्त्री शेख हसिनाले २८ जनवरीमा ढाकामा परीक्षणस्वरुप यो खोप दिइएको र आइतबारदेखि यस खोप अभियान शुरु भएको हो। यस परीक्षणमा देशका ५२९ जना स्वास्थ्यकर्मीले खोप लिएका थिए।
प्रधानमन्त्री शेख हसिनाले संसदमा गरेको सम्बोधनमा सरकारले प्राथमिकताका आधारमा १ करोड ६९ लाखलाई खोप दिन पर्याप्त व्यवस्था गरेको बताइएको छ।
बंगलादेशलाई जनवरी २१ मा अक्सफोर्ड र एस्ट्राजेनेकाबाट निर्मित २० लाख खोपको भारतले उपहार दिएको थियो। बंगलादेशले भारतको सेरम संस्थानबाट खोपको ५० लाख डोज किनेको छ। उक्त खोप जनवरी २५ मा नै बङ्गलादेश आइपुगेको थियो।
