काठमाडौं: कोभिड-१९ विरुद्धको पहिलो चरणको खोप अभियान भोली शनिबार सकिदैछ । अभियानको दशौँ दिनसम्म नेपालभर १ लाख ७१ हजार बढीले खोप लगाएका छन् ।
७७ जिल्लाका २ सय १ खोप केन्द्रहरुबाट शुक्रबार सम्म १ लाख ७१ हजार ४ सय ८६ जनाले खोप लगाएको स्वास्थ्य तथा जनसंख्या मन्त्रालयले जनाएको छ ।
अहिलेसम्म प्रदेश नम्बर १ मा २३ हजार ८२, प्रदेश नम्बर २ मा २२ हजार सात सय ५६, वाग्मतीमा ५९ हजार नौ सय ४२ जनाले खोप लगाएका छन् ।
त्यस्तै गण्डकी प्रदेशमा १७ हजार तीन सय १५, लुम्बिनीमा २६ हजार आठ सय ९८, कर्णालीमा आठ हजार ६ सय ८४ र सुदूरपश्चिममा १२ हजार आठ सय नौ जनाले खोप लगाएको मन्त्रालयका प्रवक्ता डा. जागेश्वर गौतमले जानकारी दिनुभयो ।
दोस्रो चरणको खोप बारे छिट्टै नै जानकारी गराइने मन्त्रालयले जनाएको छ। भारत सरकारले अनुदानमा कोभिशिल्ड खोप उपलब्ध गराएपछि यही माघ १४ गतेदेखि पहिलो चरणको खोप अभियान सुरु भएको थियो ।
