एजेन्सी
कोरोना भाइरसविरुद्धको अभियानका लागि १० अभियानको घोषणा गर्दै राष्ट्रपति जे बाइडेनले महामारीमाथि विजय प्राप्त गर्न केही महिना लाग्ने भए पनि अमेरिका यसबाट बाहिरि निस्कने बताउनुभएको छ । तर त्यसका लागि नागरिक एकतावद्ध हुनु पर्ने उहाँले बताउनुभयो ।
कार्यकारी आदेश अनुसार खोप अभियानलाई तीव्रता प्रदान गरिने छ भने परीक्षणको दायरा बढाइने छ । मास्कसहितका अत्यावश्यक सामग्रीको उत्पादन बढाउनका लागि अकास्मिक कानून लागु गरिने भएको छ ।
यसअघिका राष्ट्रपति डोनाल्ड ट्रम्पको प्रशासनले कोरोना भाइरसविरुद्धको प्रयासका लागि कमजोर काम गरेको भन्दै आलोचना हुँदै आएको थियो । ट्रम्प प्रशासनको नीति विपरित बाइडनेले महामारीविरुद्धको अभियानका लागि राष्ट्रिय रणनीति तय गर्नुभएको छ ।
कोरोना भाइरसको महामारीका कारण विश्वमै सबैभन्दा बढि प्रभावित भएको अमेरिकामा कोभिड–१९ का कारण चार लाख ८ हजार भन्दा बढिको ज्यान गएको छ । अहिलेसम्म अमेरिकामा दुई करोड ४५ लाख ५२ हजार भन्दा बढि संक्रमित भएका छन् ।
