नेपालगन्ज: सरकारले कोरोनाको सम्भावित तेस्रो लहरको चुनौतिसँग जुध्नेबारे तयारी अवस्थामा रहन मुलुकभरका अस्पताललाई निर्देशन दिएको छ ।
स्वास्थ्य मन्त्रालयद्वारा आयोजित प्रेस ब्रिफिङमा स्वास्थ्यमन्त्री विरोध खतिवडाले उक्त जानकारी दिनुभयो ।
छिमेकी मुलुकमा ओमिक्रोन संक्रमण तीव्ररुपमा फैलिएको सन्दर्भमा नेपालले अपनाउनुपर्ने मापदण्ड र सतर्कता तथा पछिल्लो परिस्थितीबारे जानकारी दिन मन्त्री खतिवडाले ब्रिफिङमा बोल्नु भएको हो।
उहाँले अस्पतालहरुलाई अक्सिजनसहितका उपचारलाई तयारी अवस्थामा रहन पत्राचारसहित निर्देशन दिइएको बताउनुभयो ।
सीमा नाका हुँदै भारतबाट आउनेहरुलाई कडाइपूर्वक परीक्षण तथा क्वारेन्टिनमा राख्न सरकारले काम गरिरहेको बताउँदै हवाइमार्गबाट आउनेलाई पनि कडाइ गरिएको बताउनुभयो ।
