बुटवलः लुम्बिनी प्रादेशिक अस्पतालमा करिब १० करोड रुपैयाँ लागतमा क्यान्सर स्क्रिनिङ एण्ड डाइग्नोष्टिक सेन्टर स्थापना हुने भएको छ ।
रोटरीको ग्लोबल ग्रान्ट प्रोजेक्ट अन्तर्गत रोटरी क्लब अफ बुटवलले मंगलबार बुटवलमा पत्रकार सम्मेलन गरी मेगा प्रोजेक्टका रुपमा क्यान्सर स्क्रिनिङ सेन्टर स्थापना गर्न लागेको क्लबका अध्यक्ष डा ताराप्रसाद उपाध्यायले जानकारी दिनुभयो ।
विशेष गरी महिलाको पाठेघर र स्तनको क्यान्सर रोग पत्ता लगाउने उद्देश्यले लुम्बिनी प्रदेशमै पहिलो पटक क्यान्सर स्क्रिनिङ सेन्टर स्थापनाका लागि अस्पतालसंग सम्झौता भई प्रक्रिया अघि बढेको क्लबले जानकारी गराएको छ ।
करीब १० करोड रुपैयाँको मेगा प्रोजेक्ट भएको र सुरुमा यसका लागि साढे २ करोड लगानी गर्न लागिएको क्लबका अध्यक्ष डा उपाध्यायले बताउनुभयो । क्लबले स्वास्थ्य र सामाजिक क्षेत्रलाई लक्षित गर्दै अन्य तीनवटा योजना पनि अगाडि बढाएको छ ।
