नेपालगन्जः बालबालिकालाई आजदेखि भिटामिन ‘ए’ र जुकाको औषधि खुवाउन सुरु गरिएको छ । आज र भोलि दुई दिन भिटामिन ‘ए’ र जुकाको औषधि खुवाउने कार्यक्रम रहेको स्वास्थ्य कार्यालय बाँकेका खोप अधिकृत भेषराज शर्माले जानकारी दिनुभयो ।
सरकारले ६ महिनादेखि ५ वर्षसम्मका बालबालिकालाई भिटामिन ‘ए’ र १ वर्षदेखि ५ वर्षसम्मका बालबालिकालाई जुकाको औषधि खुवाउँदै आएको छ । बाँकेमा ५० हजार बालबालिकालाई भिटामिन ‘ए’ र ४३ हजार ५ सय बालबालिकालाई जुकाको औषधि खुवाउने लक्ष्य छ ।
आफूलाई पायक पर्ने खोप केन्द्रमा गएर बालबालिकालाई भिटामिन ‘ए’ र जुकाको औषधि खुवाउन खोप अधिकृत शर्माले आग्रह गर्नुभयो । बाँकेका ८१ वटै वडामा ७ सय ७९ महिला स्वास्थ्य स्वयमसेविकाहरुले औषधि खुवाउने छन् ।
कोरोना संक्रमणको जोखिम कायमै रहेकाले खोप केन्द्रमा जाँदा जनस्वास्थ्यका मापदण्ड अनिवार्य रुपमा पालना गर्न पनि उहाँको आग्रह छ ।
६ महिनादेखि ५९ महिनासम्मका बालबालिकामा हुन सक्ने स्वास्थ्य जटिलता तथा कुपोषणको जोखिम न्यूनीकरण गर्नका लागि २०५० सालदेखि भिटामिन ‘ए’ कार्यक्रम सञ्चालन हुँदै आएको छ ।
जुकाको औषधि भने २०५६ सालदेखि खुवाउन थालिएको हो । सरकारले प्रत्येक वर्ष दुई चरणमा बालबालिकालाई भिटामिन ‘ए’ र जुकाको औषधि खुवाउँदै आएको छ ।