नेपालगन्जः बाँकेमा आज थप १५ जनामा कोरोना भाइरस संक्रमण पुष्टि भएको छ । तीनवटा प्रयोगशालामा १३८ नमुना परीक्षण गर्दा १५ जनामा संक्रमण पुष्टि भएको हो ।
भेरी अस्पतालमा ७६ नमुना परीक्षण गर्दा १४ र बागेश्वरी प्रयोगशालामा २५ नमुना परीक्षण गर्दा १ जना संक्रमित थपिएका हुन् । मेडिकल कलेज कोहलपुरमा ३७ नमुना परीक्षण गर्दा सबै रिपोर्ट नेगेटिभ आएको जिल्ला कोभिड–१९ व्यवस्थापन केन्द्रले जनाएको छ । आज संक्रमण पुष्टि भएका मध्य ६ जना बाँकेका हुन् ।
नेपालगन्ज र खजुराका २-२, राप्तीसोनारी र कोहलपुर नगरपालिकाका १-१ जना रहेका छन् । योसँगै जिल्लामा कुल संक्रमितको संख्या १८ हजार १ सय ४८ पुगेको छ । यस्तै आज थप २ जना डिस्चार्ज भएका छन् ।
योसँगै डिस्चार्ज हुनेको संख्या १७ हजार ७ सय ६० पुगेको छ । जिल्लामा सक्रिय संक्रमितको संख्या अहिले ८१ जना छन् ।
