नेपालगन्जः बाँकेका चार पालिकामा कोरोना विरुद्धको भेरोसेल खोपको पहिलो डोज ८२ प्रतिशत बढीले लगाएका छन् ।

जिल्लाका बैजनाथ, नरैनापुर, राप्तीसोनारी र डुडुवा गाउँपालिकामा तीन दिनको अवधिमा ८२ दशमलव ८ प्रतिशतले खोप लगाएका हुन् । लक्षित समुदाय ५५ वर्ष माथिका सबै, शिक्षक तथा यातायातकर्मी गरी ९ हजार १ सय २८ जनाले खोप लगाएको स्वास्थ्य कार्यालय बाँकेका खोप अधिकृत भेषराज शर्माले बताउनुभयो ।

यहाँ ११ हजार २५ जनालाई खोप लगाउने लक्ष्य थियो। सबैभन्दा धेरै बैजनाथ गाउँपालिकामा शत प्रतिशत र सबैभन्दा कम नरैनापुर गाउँपालिकामा ३४ प्रतिशतले खोप लगाएका छन् ।

राप्तीसोनारीमा ९१ र डुडुवा गाउँपालिकामा ७७ प्रतिशतले खोप लगाएको खोप अधिकृत शर्माले बताउनुभयो । नेपालगन्ज, कोहलपुर, खजुरा र जानकी गाउँपालिकामा यही १० गतेदेखि खोप लगाउने कार्यसूचि तय गरिएको छ ।