काठमाडौं: चीनबाट सरकारले खरिद गरेको भेरोसेल खोपको पहिलो खेप लिएर नेपाल वायुसेवा निगमको वाइडबडी जहाज नेपाल फर्किएको छ। नेपाल वायुसेवा निगमको वाइडबडी जहाजले आज बिहान भेरोसेल खोप ल्याएको हो।
निगमको जहाज हिजो खोप लिन चीन गएको थियो । पहिलो खेपमा नेपाल सरकारले चीनको सिनोफार्म कम्पनीसँग खरिद गरेको ८ लाख डोज खोप नेपाल ल्याईएको हो। अब साउन ८ गतेसम्म तीन वटा उडानमार्फत निरन्तर खोप आउने स्वास्थ्य मन्त्रालयले जनाएको छ ।
अब ६० वर्षमुनि उमेर समूहकालाई प्राथमिकताका आधारमा खोप लगाउने मन्त्रालयको तयारी छ । यस्तै कोभ्याक्स सुविधामार्फत आउने खोप पनि छिट्टै ल्याउने मन्त्रालयले जनाएको छ । नेपालमा अहिलेसम्म आठ लाख ५१ हजार ३०० जनालाई दोस्रो मात्रा र २६ लाख ११ हजार ८ सय ७ जनालाई पहिलो मात्रा लगाइएको छ।