घोराहीः दाङमा अक्सिजन अभाव भएपछि बाहिरी जिल्लाबाट अक्सिजन ल्याउन थालिएको छ। प्रदेश सरकारको पहलमा शनिबार दाङमा इटहरीबाट ११२ र नेपालगञ्जबाट ६९ अक्सिजन सिलिन्डर आएको हो।
यी अक्सिजन सिलिण्डर कोभिड अस्पतालमा पुर्याउने काम भएको दाङका प्रमुख जिल्ला अधिकारी दीर्घनारायण पौडेलले जानकारी दिनुभयो ।
दाङमा भएको अक्सिजन प्लान्टमा उत्पादन कम भएपछि बाहिरी जिल्लाबाट अक्सिजन ल्याउनु परेको हो। जिल्लामा दैनिक ७०० सिलिन्डर अक्सिजन आवश्यक छ । तर, जिल्लामा दैनिक ११० सिलिन्डर मुस्किलले उत्पादन हुने गरेको छ।
इटहरीबाट आएको सिलिन्डरमध्येबाट ३० वटा राप्ती स्वास्थ्य विज्ञान प्रतिष्ठानमा, बेलझुन्डी अस्पतालमा ६० वटा, लमही अस्पतालमा १० वटा, शान्तिनगर गाउँपालिकाको आइसोलेसनमा ५ वटा र बाँकी ७ वटा बिरामीलाई उपलब्ध गराइएको छ।
