काठमाडौं: काठमाडौं उपत्यकामा आजबाट अत्यावश्यक सेवा बाहेकका कार्यालय बन्द हुने भएका छन् । उपत्यकामा आजबाट जेठ १३ गतेसम्म थपिएको निषेधाज्ञा लागू भएपछि अत्यावश्यक सेवा बाहेकका कार्यालय समेत बन्द हुने भएका हुन् ।
यद्यपि अत्यावश्यक सेवाका कार्यालय भने सञ्चालनमा आउनेछन् । औषधि, खाद्यान्न तथा अन्य अत्यावश्यक उपभोग्य वस्तु वा सेवा खरिदका लागि तथा अत्यावश्यक सेवाका लागि मात्र निस्कन पाईनेछ ।
काठमाडौंका प्रमुख जिल्ला अधिकारी कालीप्रसाद पराजुलीका अनुसार यसपटकको निषेधाज्ञामा बिहान १० बजेसम्म अत्यावश्यक खाद्य सामग्रीका पसल, व्यवसाय र डिपार्टमेन्टल स्टोर्स (खाद्य सामग्री मात्र बिक्री गर्न) खुला हुनेछन् ।
मानिसको भीडभाड हुने सबै गतिविधिमा रोक लगाइएको छ । उपत्यकामा गएराति १२ बजेदेखि लागू हुने गरी आगामी जेठ १३ गते राति १२ बजेसम्मका लागि निषेधाज्ञा थप गरिएको छ ।
