नेपालगन्ज: कोरोना भाइरस संक्रमणका कारण बाँकेमा थप दुईजनाको मृत्यु भएको छ । नेपालगन्ज मेडिकल कलेजमा एकजना र भेरी अस्पताल नेपालगन्जमा एकजना गरि थप दुईजनाको मृत्यु भएको अस्पतालले पुष्टि गरेका छन् ।
मृत्यु हुनेहरुमा नेपालगन्ज उपमहानगरपालिका-१४ का ६० वर्षिय पुरुष र गुर्वाकोट नगरपालिका-८ सुर्खेतका ५३ वर्षिय पुरुष हुनुहुन्छ । नेपालगन्ज-१४ का ६० वर्षिय पुरुषको बैशाख १० गते पीसीआर परीक्षण गरिएको थियो ।
थप उपचारका लागि १२ बैशाखमा भेरी अस्पतालमा भर्ना हुनुभएका उहाँको आज दिउँसो २:४० बजे मृत्यु भएको अस्पतालले जनाएको छ । त्यस्तै गुर्वाकोट ८ सुर्खेतका ५३ वर्षिय पुरुषको स्वास्थ्यमा समस्या आएपछि बैशाख २३ गते पीसीआर परीक्षण गरि सोही दिन अस्पताल भर्ना गरिएको थियो ।
स्वास्थ्यमा सुधार नआउँदा उहाँको आज दिउँसो २:५० बजे मृत्यु भएको जिल्लाका कोभिड फोकलपर्सन तेज वलीले जानकारी दिनुभयो ।
योसँगै बाँकेमा कोरोना भाइरस संक्रमणका कारण उपचारका लागि आएका जिल्ला बाहिरका १५२ जना र जिल्लाकै १९८ जनाको मृत्यु भईसकेको छ ।
