नेपालगन्ज: कोरोना भाइरस संक्रमणबाट निको भएर बाँकेमा दिन प्रतिदिन सयौं बिरामीहरु डिस्चार्ज हुन थालेका छन् । संक्रमित संख्या दिन प्रतिदिन बढ्दै गएको बाँकेमा संक्रमण मुक्त हुनेहरुको संख्या पनि बढ्दै गएको हो ।
जिल्ला कोभिड-१९ संकट व्यवस्थापन केन्द्रका अनुसार शनिबार पनि जिल्लामा ठूलो संख्यामा कोभिड संक्रमण जितेर डिस्चार्ज भएका छन् ।
जिल्लाका विभिन्न संस्थागत आइसोलेसन र होम आइसोलेसनमा रहेका १७८ महिला र २३१ जना पुरुष गरि ४०९ जना आज डिस्चार्ज हुनुभएको छ ।
संक्रमण नियन्त्रणमा नआउँदा जिल्ला अहिले लकडाउनमा छ । संक्रमण पुष्टि भएकाहरु अधिकांश होम आइसोलेसनमा स्वास्थ्य लाभ गरिरहेका छन् ।
चिकित्सकहरुले घरमै स्वास्थ्य लाभ गरिरहेका संक्रमितहरुलाई विशेष ख्याल गर्न आग्रह गर्नुभएको छ । अक्सिजन लेभल पटक पटक जाच्न, सरसफाईमा ध्यान दिन, झोलिलो खानेकुरा खान उपचारमा संलग्न चिकित्सकहरुले आग्रह गर्नुभएको हो ।
