बुटवल ०५, साउन ।
प्रदेश ५ सरकारले समुदाय स्तरमा कोरोना सक्रमण भए नभएको पत्ता लगाउन पिसिआर परीक्षण गर्ने भएको छ । देश ५ का ६ जिल्लाबाट भोली मंगलवारदेखि स्वाब संकलन सुरु गर्न लागिएको सामाजिक विकासमन्त्री सुदर्शन बरालले जानकारी दिनुभयो । उहाँका अनुसार अधिक जनसम्पर्क हुने स्थानमा रहने व्यक्तिको पिसिआर परीक्षण गरिनेछ ।

कोरोना महामारीको प्रभाव समुदायस्तरसम्म फैलिएको हो होइन् भन्नेबारे पत्ता लगाउन अधिक जनसम्पर्क हुने स्थानमा रहेका व्यक्तिबाट नमूना संकलन गरिने मन्त्री बरालको भनाइ छ ।

बर्दिया, कपिलवस्तु, अर्घाखाँची, नवलपरासी पश्चिम, रूपन्देही, र दाङका १ हजार २ सय व्यक्तिको नमूना संकलन गर्ने प्रदेश सरकारको तयारी छ । नमूना संकलन बैंक तथा वित्तीय संस्था, अत्यावश्यक सामग्री बिक्री वितरण गर्ने पसल, स्वास्थ्यकर्मी र जनसमुदाय स्तरका व्यक्तिको गरिने छ । यसबाट समुदायस्तरमा जोखिमको स्तर जानकारी हुने मन्त्रालयको भनाइ छ ।