नेपालगन्ज ०२, साउन ।
नेपालगन्ज कारागारका एकजना थुनुवामा कोरोना भाइरस पुष्टि भएको छ । शरीरमा रगतको कमी देखिएपछि भेरी अस्पताल, नेपालगञ्जमा उपचार गर्न पुगेका नेपालगञ्ज कारागारका थुनुवासँगै गएका प्रहरीमा पनि कोरोना पुष्टि भएको छ। नेपालगञ्ज–६ का २८ वर्षीय युवा र कारागार सुरक्षार्थ रहेका एकजना प्रहरीमा कोरोना पुष्टि भएको कारागारका जेलर देवेन्द्र श्रेष्ठले जानकारी दिनुभयो।

बिरामी भएपछि थुनुवालाई भेरी अस्पताल, नेपालगञ्ज लगिएको थियो। दुई रात उनलाई त्यही राखियो । अस्पतालले उनलाई आइसोलेसन वार्डमा राखेको थियो। थुनुवा चोरी मुद्दाका हुन्।जेलर श्रेष्ठले दुई रातको उपचार पछि थुनुवालाई कारागारमा ल्याइएको जानकारी दिनुभयो । कारागार ल्याएपछि उनलाई छुट्टै ठाउँमा राखेर पीसीआर जाँच गरिएको थियो।

कारागार बाहिर गएर आएकाले कोरोनाको आशंका गरेर छुट्टै ठाउँमा राखिएको जेलर श्रेष्ठले बताउनुभयो । थुनुवा र प्रहरीको रिपोर्ट पोजिटिभ आएपछि अहिले उनीहरुलाई आइसोलेसन सेन्टरमा पठाइएको छ ।नेपालगञ्ज कारागार प्रशासनले कोरोनाको त्राससँगै कारागारमा भेटघाट रोकेको छ । नेपालगञ्ज कारागारमा अहिले ७ सय ७७ जना थुनुवा छन्।