बुटवल २०, जेष्ठ ।
प्रदेश ५ सरकारले कोरोना भाइरसको संक्रमणबाट मृत्यु हुनेको परिवारलाई एक लाख रुपैयाँ दिने भएको छ ।
मंगलबार बसेको मन्त्रिपरिषद बैठकले कोरोना संक्रमणबाट मृत्यु हुने व्यक्तिका परिवारलाई एक लाख रुपैयाँ राहतस्वरुप दिने निर्णय गरेको प्रवक्ता बैजनाथ चौधरीले जानकारी दिनुभयो ।
कोरोनाबाट मृत्यु हुनेको शव बोक्ने वाहन अभाव भएकाले शव बोक्नका लागि दुई वटा शववाहन खरिद गर्न दुईवटा अस्पताललाई १५–१५ लाख रुपैयाँ दिने निर्णय भएको उहाँले बताउनुभयो ।
बाँकेको खजुरास्थित सुशील कोइराला प्रखर क्यान्सर अस्पताल र दाङको बेलझुण्डीस्थित आयुर्वेद अस्पतालमा बनाइएको कोरोना विशेष अस्थायी अस्पताललाई १५–१५ लाख रुपैयाँ दिने निर्णय भएको उहाँले बताउनुभयो ।
यस्तै प्रदेश सरकारले कोरोना कोष निर्देशिका परिमार्जन गरी कोरोना विशेष अस्पतालमा खटिने प्रहरीलाई खाना खर्च र स्वाब संकलनमा खटिने स्वास्थ्यकर्मीलाई पनि भत्ताको व्यवस्था गर्ने निर्णय गरेको छ ।
बैठकले कोरोना भाइरस नियन्त्रण तथा उपचार कोष स्थापना र सञ्चालन० निर्देशिका पहिलो संसोधन २०७७ स्वीकृत गर्दै यस्तो सुविधा दिने निर्णय भएको हो ।
मन्त्री चौधरीका अनुसार बैठकले लैंगिक सम्पर्कविन्दु व्यवस्थापन र परिचालन कार्यविधि २०७७ र प्रदेश बालक्लब सञ्जाल गठन तथा सञ्चालनसम्बन्धि कार्यविधि २०७७ पारित गरेको छ ।
