नेपालगन्ज १६, कात्तिक ।
बाँके खजुरा गाउँपालिकाका ४० बर्षीय पुरुषको मृत्युपछि कोरोना पुष्टि भएको छ । खजुरा गाउँपालिका-३ वि गाउँका ती पुरुषको उपचारका क्रममा नेपालगन्ज मेडिकल कलेज कोहलपुरमा मृत्यु भएको जिल्ला कोभिड-१९ संकट व्यवस्थापन केन्द्र बाँकेले जनाएको छ ।

श्वासप्रश्वासमा समस्या आएपछि उनलाई शनिवार दिउँसो अस्पतालमा भर्ना गरिएको थियो । लगत्तै कोरोना परीक्षणका लागि स्वाब निकालिएको थियो । तर उनको राती ११ बजे नै मृत्यु भएको अस्पतालले जनाएको छ ।

आज आइतवार रिपोर्ट पोजेटिभ आएपछि उनलाई भाइरस संक्रमण पुष्टि भएको हो । योसँगै बाँकेमा कोरोना भाइरस संक्रमणबाट मृत्यु हुनेको सख्या ३२ पुगेको छ ।