नेपालगन्ज १६, कात्तिक ।
बाँकेमा तीन बर्षीय बालकले कोरोना भाइरस संक्रमण जितेका छन् । कोहलपुर नगरपालिका-४ का ती बालकलाई १० दिन अघि भाइरस संक्रमण पुष्टि भएको थियो ।
जिल्ला कोभिड-१९ संकट व्यवस्थापन केन्द्रका फोकलपर्सन नरेश श्रेष्ठका अनुसार, उनीसँगै नेपालगन्जका ८ बर्षीय बालकले पनि कोरोना जितेका छन्। नेपालगन्ज उपमहानगरपालिका-१ धम्वोजीका ती बालक पनि आज भाइरस संक्रमणमुक्त भएका छन् । तीन बर्षीय बालक होमआइसोलेसनमा बसेका थिए भने आठ बर्षीय बालक भेरी अस्पतालको आइसोलेसनमा बसेका थिए ।
बाँकेमा ३ र ८ बर्षीय बालकसहित आज ६० जनाले कोरोना भाइरस जितेका छन् । २४ महिला र ३६ पुरुष गरी ६० जना संक्रमित कोरोना मुक्त भई डिस्चार्ज भएको श्रेष्ठले बताउनुभयो। उनिहरुलाई कात्तिक ६ गते कोरोना संक्रमण देखिएपछि विभिन्न आइसोलेसनमा बसेका थिए ।
योसँगै बाँकेमा कोरोना संक्रमणबाट मुक्त हुनेको संख्या २ हजार ८सय ८४ पुगेको छ । विभिन्न आइसोलेसन केन्द्रमा अहिले २ सय ३२ जना सक्रिय संक्रमित उपचाररत छन् । जिल्लामा हालसम्म कोरोनाबाट संक्रमितको संख्या ३ हजार १ सय ४७ रहेको छ भने ३१ जनाको मृत्यु भईसकेको छ ।
