नेपालगन्ज ४, कात्तिक ।
बाँकेमा मंगलवार थप ७४ जनामा कोरोना भाइरस संक्रमण पुष्टि भएको छ । जिल्लाका तीनवटा प्रयोगशालामा गरीएको पीसीआर परीक्षणमा २६ महिला र ४८ पुरुषमा कोरोना भाइरस संक्रमण पुष्टि भएको जिल्ला कोभिड-१९ संकट व्यवस्थापन केन्द्रका फोकलपर्सन नरेश श्रेष्ठले जानकारी दिनुभयो ।
भेरी अस्पताल नेपालगन्जको प्रयोगशालामा ५०, नेपालगन्ज मेडिकल कलेज कोहलपुरको प्रयोगशालामा १३ जना र कोहलपुरमै रहेको बागेश्वरी प्रयोगशालामा ११ जनामा भाइरस संक्रमण पुष्टि भएको छ । योसँगै बाँकेमा कुल संक्रमितको संख्या २ हजार ८ सय ३ पुगेको छ ।
यस्तै मंगलवार विभिन्न अस्पताल, संस्थागत आइसोलेसन सेन्टर तथा होमआइसोलेसनबाट ६६ जना डिस्चार्ज भएका छन् । योसँगै डिस्चार्ज हुनेको संख्या २ हजार १ सय ७५ पुगेको छ । अहिलेसम्म बाँकेका २९ जनाको कोरोना भाइरस संक्रमणबाट मृत्यु भइसकेको फोकलपर्सन श्रेष्ठले बताउनुभयो ।
