नेपालगन्ज ११, भदौ ।
भेरी अस्पताल नेपालगन्जका थप एकजना चिकित्सकमा पनि कोरोना भाइरस संक्रमण पुष्टि भएको छ । यो सँगै भेरी अस्पतालमा पाँचजना चिकित्सकमा भाइरस संक्रमण देखिएको छ । आज थप भएका चिकित्सक स्त्रीरोग बिशेषज्ञ हुन् । उनको छोरालाई समेत भाइरस संक्रमण पुष्टि भएको छ ।
यसअघि भेरी अस्पतालका कोरोना फोकलपर्सन समेत रहनु भएका फिजिसियन डा.संकेत रिसालसँगै प्रमुख कन्सल्टेन्ट फिजिसियन डा.राजन पाण्डे, फिजिसियन डा.रजनी केसी शाह, हार्डजोर्नी विशेषज्ञ डा. राहुल मिश्रलाई कोरोना पोजेटिभ देखिएको थियो ।
भेरी अस्पताल नेपालगन्ज प्रयोगशालामा पछिल्लो २४ घण्टामा चारसयको नमुना परीक्षण गर्दा चिकित्सकसहित ३५ जनामा कोरोना पोजेटिभ देखिएको हो । त्यसमा बाँकेका ३३ र बर्दियाका २ जना छन् । बाँकेमा संक्रमित थपिनेक्रममा नेपाली सेनाको राझा व्यारेकका ६ जना पनि परेका छन् ।आज ३३ जना थपिएसँगै बाँकेमा कोरोना संक्रमितको संख्या ९ सय ५३ पुगेको छ ।
