नेपालगन्जः कोहलपुर शिक्षण अस्पतालमा कोरोना परीक्षणका लागि स्वाब दिन पालो कुरेर बसेका एकजना संक्रमितको मृत्यु भएको छ । कोहलपुर–५ का करिब ५९ वर्षीय पुरुषको शुक्रबार दिउँसो मृत्यु भएको अस्पतालका डा देवेन्द्र आचार्यले जानकारी दिनुभयो ।

सास फेर्न गाह्रो भएपछि उनी अस्पताल पुगेका थिए । तर स्वाब दिने पालो नआउँदै उनको मृत्यु भएको हो ।

अस्पताल ल्याउन ढिलो भएको कारण अक्सिजन लेभल कम भएर उनको मृत्यु भएको हुन सक्ने उहाँको भनाइ छ ।

स्वाब दिन पालो कुरेर बस्दा बस्दै अस्पतालको प्रांगणमा मृत्यु भएपछि उनीसँगै आएका आफन्तले शवलाई अटोमा राखेर घर लगेको पनि उहाँले जानकारी दिनुभयो ।