- आधारभूत स्वास्थ्य सेवाबाट कुनै पनि नागरिक बञ्चित हुन नपरोस् भन्ने एउटामात्रै उद्देश्य हो : शाह
- स्वास्थ्य उपकरणहरुको उपयोग र संरक्षणमा पालिका प्रतिबद्ध: नगर प्रमुख खड्का
नेपालगन्ज: कुमारी फाउन्डेसन काठमाडौंले जाजरकोटको छेडागाड नगरपालिका वडा नं.५ स्थित फुर्किचउरमा रहेको नगर अस्पताललाई तीन करोड बढीको स्वास्थ्य उपकरण हस्तान्तरण गरेको छ ।
आइतवार नेपालगन्जमा आयोजित एक कार्यक्रमका बीच रोटरी क्लव अफ काठमाडौं र रोटरी क्लव अफ मुम्वई कप परेडले कुमारी फाउन्डेसनलाई उपलब्ध गराएको स्वास्थ्य उपकरण फाउन्डेसनले छेडागाड नगरपालिकालाई हस्तान्तरण गरेको हो ।
कर्णाली प्रदेशका आर्थिक मामिला तथा योजना मन्त्री समेत रहेका फाउन्डेसनका अध्यक्ष राजिव विक्रम शाहले पालिकाका अध्यक्ष रत्न बहादुर खड्कालाई उक्त स्वास्थ्य उपकरणहरु हस्तान्तरण गर्दै स्थानीयलाई स्वास्थ्य सेवाको पहुँच उपलब्ध गराउने आफ्नो सपनाले पूर्णता पाएको भन्दै खुसी व्यक्त गरे ।
२०६७–०६८ सालमा जाजरकोटमा झाडापखला फैलिँदा करिव दुई सय नागरिकले ज्यान गुमाएका थिए । हजारौं नागरिक प्रभावित भएका थिए । त्यतिबेला पनि शाहले आफ्नै लगानीमा हेलिकप्टर चार्टर गरेर औषधि र चिकित्सक गाउँगाउँमा पुर्याएर रोग नियन्त्रणमा प्रभावकारी भूमिका निर्वाह गरेका थिए ।
मन्त्री शाहले स्वास्थ्य चौकी अभावमा नागरिकले अकालमा ज्यान गुमाउनु परेको दर्दनाक अवस्था देखेरै अस्पताल सञ्चालनका लागि निःशुल्क जग्गा उपलब्ध गराएका थिए । त्यही जग्गामा शाहले १५ शैयाको अस्पताल सञ्चालनका लागि पूर्वाधार समेत बनाए । तर चार-पाँच वर्ष अघि नै सञ्चालनमा आउनुपर्ने अस्पताल विभिन्न कारणले अलपत्र अवस्थामै रह्यो ।
अस्पतालका लागि रोटरी क्लवले कुमारी फाउण्डेसनलाई उपलब्ध गराएको करोडौं मुल्यका स्वास्थ्य सामग्री नेपालगन्जमै विगत तीन वर्षदेखि अलपत्र जस्तै भए । तर अहिलेका नगर प्रमुख खड्काले अस्पताललाई आफ्नो पालिका मातहतमा ल्याउने सकारात्मक प्रयासकाबीच लामो समयसम्म नेपालगन्जमा थन्किएर रहेका करोडौं मुल्यका स्वास्थ्य उपकरणहरु आइतवार जाजरकोट लगिने भएको छ ।
मानवीय सेवाको उद्देश्यले यी स्वास्थ्य सामग्रीहरु छेडागाड नगर अस्पताललाई हस्तान्तरण गरिएको हो मन्त्री शाहले भने–‘यसमा कुनै राजनीतिक भाव छैन । आधारभूत स्वास्थ्य सेवाबाट कुनै पनि नागरिक बञ्चित हुन नपरोस् भन्ने एउटामात्रै उद्देश्य हो ।’
उनले समृद्धि र स्थायित्वका लागि राजनीतिकरण गर्न नहुने सुझाव दिए । सोचे जस्तो उपलब्धि हासिल गर्न त कठिन छ तर उनले भने-`परिस्थिति बदल्ने गरि आम नागरिकको हितमा काम गर्नु अहिलेको आवश्यकता छ । त्यसका निमित्त समृद्धि र विकासमा कसैले पनि राजनीति गर्न हुँदैन ।´
फाउन्डेसनले डेन्टल, आँखा, गाइने, बालरोग विभाग, जनरल वार्ड, इएन्टी वार्डमा आवश्यक पर्ने वेशिक र सर्जिकल स्वास्थ्य सामग्री नगर अस्पताललाई उपलब्ध गराएको छ । त्यसैगरी प्रयोगशालाका लागि आवश्यक पर्ने महत्वपूर्ण उपकरण पनि फाउन्डेसनले पालिकालाई उपलब्ध गराएको प्रमुख प्रशासकीय अधिकृत हेमकुमार ढकालले बताए ।
पालिकाका नगर प्रमुख खड्काले प्राप्त स्वास्थ्य उपकरणहरुको उपयोग र संरक्षणमा पालिका प्रतिबद्ध रहेको बताए । उनले अस्पताललाई नमूना अस्पताल बनाउने घोषणा गरे । बजेट र जनशक्ती व्यवस्थापनमा पालिकाले पूर्णरुपमा सहयोग गर्ने प्रतिबद्धता जनाए ।
करिव ७–८ करोडको भौतिक संरचना निर्माण भइसकेकाले फाउण्डेसनबाट प्राप्त उपकरणले स्वास्थ्य सेवा प्रवाहका निमित्त ठूलो भूमिका निर्वाह गरेको उनले बताए । अस्पतालको भौतिक पूर्वाधारमा आवश्यक मर्मत सम्भार गरेर आगामी असार ५ गते भव्य कार्यक्रमका बीच सेवा सुरु गरिने पनि उनले जानकारी दिए ।
यो अस्पताल संचालनमा आए छेडागाड नगरपालिकासहित दैलेख, सुर्खेत र डोल्पासम्मका बिरामीले सेवा पाउने नगर प्रमुख खड्काले बताए ।
स्वास्थ्य सामाग्री हस्तान्तरण कार्यक्रममा रोटरी क्लवका पूर्व अध्यक्ष शशी सत्याल, सर्विस चेयर सञ्जय कुमार अग्रवाल, जिल्ला समन्वय समिति जाजरकोटका प्रमुख कालिबहादुर खत्री लगायतको उपस्थिति रहेको थियो ।
