नेपालगन्जः लुम्बिनी प्रदेशका १२ जिल्लाका स्वास्थ्य कार्यालय मध्ये न्यूनतम सेवा मापदण्ड र सम्पादित कार्य प्रगतिको मूल्यांकनमा स्वास्थ्य कार्यालय पाल्पा पहिलो बन्न सफल भएको छ । आर्थिक वर्ष २०८०/०८१ मा सम्पादित कार्य सम्पादन मूल्यांकनमा पाल्पाले अन्य ११ जिल्लाका स्वास्थ्य कार्यालयलाई पछि पारेको हो । लमहीमा आयोजना गरिएको प्रदेश स्तरीय वार्षिक समिक्षामा पाल्पालाई उत्कृष्ट घोषणा गरिएको हो ।

स्वास्थ्य कार्यालयबाट प्रदान गरिने सेवा, व्यवस्थापकीय पक्ष, कार्यालयको अवस्था र सुविधा गरी विभिन्न सूचकको प्राप्तांकका आधारमा मूल्यांकन गरिएको थियो । सूचक अनुसार स्वास्थ्य कार्यालय रोल्पा दोस्रो भएको छ भने स्वास्थ्य कार्यालय गुल्मी तेस्रो भएको छ । पहिलो हुने पाल्पाले सय अंकमा ६७.७८, दोस्रो हुने रोल्पाले ६५.९१ र तेस्रो हुने गुल्मीले ६५.८१ प्रतिशत अंक ल्याउन सफल भएका छन् ।

कपिलबस्तुले ५८.२५ प्रतिशत अंकका साथ पुछारमा छ । स्वास्थ्य कार्यालय बाँकेले भने ५९.५७ प्रतिशत अंक ल्याएर ११ औं स्थानमा छ । स्वास्थ्य कार्यालय प्युठानले ६५.५८ प्रतिशत अंक ल्याएर चौथो, रुकुमपूर्वले ६४.५० प्रतिशत अंक ल्याएर पाचौं, रुपन्देहीले ६३.८० प्रतिशत अंक ल्याएर छैठौं, बर्दियाले ६३.७७ प्रतिशत अंक ल्याएर सातौं स्थान हासिल गरेको छ । अर्घाखाँचीले ६३.५५ प्रतिशत अंक ल्याएर आठौं, दाङले ६०.९० प्रतिशत अंक ल्याएर दशौं स्थान हासिल गरेको छ ।